نقاش كبير دارتو الصورة ديال ولي العهد الأمير مولاي الحسن وهو كيبوس يد والده الملك محمد السادس، ماشي محتاجة لشرح بزاف د “البروتوكول” ولا قصائد مدح… هادي ببساطة هي ” أصالة المغربي ” فاش كيعبر مع “التربية” د الدار المغربية .
فالمغرب، بوسة اليد هي “لانديس” اللي كيعبر واش بنادم مازال شاد في ” تربية المغربية ” ولا جرفه تيار ” الهضرة ” الباسلة اللي كتحسب الاحترام “تخلف”..
بوسة اليد فبيوتنا المغربية ، من طنجة للكويرة، هي “لغة صامتة ” هي داك الدري اللي واخا يوصل للي وصل ليه، كيبقى “صغير” قدام اليد اللي كبراتو. هاد الطقس اللي كنشوفوه في أعلى هرم الدولة، هو مرآة لداكشي اللي كيطرا في كاع الديور المغربية “المرضية”. .
الملك هنا كيمارس دور “الأب”، والأمير كيمارس دور “الابن”، وهادي هي الخلطة اللي مخلية هاد لبلاد شادة في راسها وسط عالم كولشي فيه كيتريب.
أما هادوك اللي ناضوا يعيبوا هاد العادة، وكيهضرو على “الاستعباد” و “الخنوع”، راه غير ضاربهم “لوطراك” (Le trac) ديال الهوية..
كيسحاب ليهم بلي باش تكون “ديموقراطي” ولا “موديرن” خاصك تضرب بوك ومك بالركلة..
بوسة اليد للملك هي جزء من “عقد اجتماعي” مغربي بامتياز، فيه الاحترام والوقار هو العملة باش كنتعاملوا. الملك هو “كبير الدار”، وبوسان يده هو اعتراف بلي هاد لبلاد عندها “كبير” كيتجمعوا عليه الناس، ماشي غابة كياكل فيها القوي الضعيف..
هادوك “الفهامات” اللي كيقارنونا بالغرب، كينساو بلي لكل شعب “كود” (Code) خاص بيه..
حنا المغاربة، بوسة اليد عندنا هي “صمام أمان” أخلاقي هي اللي كتخلي “الحشومة” باقية شادة فينا.. فاش كتشوف ولي العهد كيديرها، راه كيعطي رسالة بلي القيم مكاتجزأش، وبلي “تمغربيت” الحقة هي اللي كتبدا من “الصواب” وتنتهي بـ “المصلحة د لبلاد”..
المسألة هي “استمرارية” ديال ” تربية مغربية ” لبلاد اللي كيحترم فيها الصغير الكبير، وكيقدر فيها المحكوم هيبة الحاكم (باعتباره رمز للوحدة)، هي بلاد عندها مناعة ضد الفوضى..
