ساخرة.أنفو

بينكي عاد إليكم من جديد !

هاني أبو الهناء - كاريكاتير : عبد القدوس المشرع الجمعة 12 مارس 2021
No Image

AHDATH.INFO

« كون كان السي عبد الله باها الله يرحمو حي، كون عبد الإله كاع مايتورط فخطوات بحال الحطوات ديال الرسالتين اللي كتب بيديه مؤخرا، حيت كان كينصحو وماكانش كيخليه يدير كاع اللي بغا ».

هادي ماشي هضرة الساخرة. هادي الهضرة ديال قيادي فالعدالة والتنمية ، وهو كيعلق فحديث جانبي بشكل حزين على إعلان عبد الإله ابن كيران أنه غادي يقاطع الوزراء ديال الحزب وغادي يجمد عضويتو فالتنظيم اللي كان دارو واحد النهار هو وعبد الكريم الخطيب وادريس البصري باش الإسلاميين ديال المغرب يدخلو للبرلمان والحكومة والمجالس.

خطوات ابن كيران الأخيرة مابانش فيها فقط التعب والرعونة، ولكن بانت فيها علامات العياء ديال الراجل اللي كان وحش سياسي حقيقي فالممارسة ديالو، ولكن اللي ربما العزلة فحي الليمون أو الاكتفاء باستقبال اللي كيقولو ليه غير شنو بغا حجبو على عينيه عديد التطورات اللي جعلات الناس تشوف بسخرية وشفقة للخطوة ديالو الأخيرة، واخا الأتباع دارو فالفيسبوك حالة وقالوا بأن هادشي دليل على أن ابن كيران باقي

هو باقي الله يطول ليه العمر، ولكن واش باقي ضابط اللعب السياسي فالمغرب اللي كنا كنعرفو أنه كيعرفو مزيان بزاف؟

هذا هو السؤال ديالنا وهو السؤال اللي مابغاش القيادي اللي دوينا معاه يجاوب عليه « العلم عند الله وصافي »