AHDATH.INFO
شي عولاما كيعيبو على هشام الملولي مسكين، وعلى ندى حاسي مسكينة وعلى نزار حتى هو مسكين، علاش ولاو شادين الطوندانس، ومحيحين فالأنترنيت المغربي.
وشي وحدين كاع زادو فيه بديك الهضرة ديال المثقفين المعقدين وقالوا « لواه هادا دليل على تردي الذائقة الفنية والجمالية والإستيتيقية ديال المغاربة وداكشي وكلشي، وعلى تهاوي المناحي الأدبوفونية ديال الشعب ».
هادي كلها هضرة خاوية. هشام ونزار وندى شباب مغاربة كيقلبو على ريوسهم. ولقاو ريوسهم فهاد الشي ديال الويب. شنو كينشرو فالصفحات ديالهم؟ هادي مسألة خاصة بيهم، اللي عجباتو راه كيتفرج فيها. واللي ماعجباتوش كيقول « لاحول ولا قوة إلا بالله » وكيزيد
المشكل فين كيبدا؟
المشكل كيبدا فالإخوة المتابعين المدمنين على داكشي اللي كيطلعو ليه عدد ال VU واللي حتى كيديرو الإشباع ديالهم من المشاهدة، عاد كيبغيو يلعبو دور رابعة العدوية وكيخرجو يسبو فداكشي..
اللي مابغاش التفاهة تنتشر مايبقاش يتفرج فيها وصافي. لذلك #هنيونا وتفرجو على خاطركم، والله مايهضر معاكم شي حد..